DEBAK, 20 Jan: Raban staf Opis Pengerai Malaysia (KKM) dipinta terus matau tikas pengerai raban ke tasah bah ke benung ngenduh ba Palan Pengenduh Sementara (PPS) di nengeri tu.
Sapit Premier Sarawak, Datuk Amar Douglas Uggah Embas madah, pekara nya beguna amat lebih agi ngagai sida ke bisi tabin sereta begunaka peresa pengerai dikena nentuka sida enda kena rampit Covid-19.
“Aku udah madah ngagai Opis Pengerai tadi ngambika mata pengerai semua ruang bilik ke pindah nyengkaum nyema bisi tabin ungkup sida diperesa awak ulih nentuka sekalika sida bisi Covid-19 tauka nadai Covid-19 nya ke beguna amat,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya pengudah ngabas raban ke tasah bah di Debak, pagi tadi.
Berebak enggau nya, Uggah muji semangat kerejasama ke dipandangka bala komiti Penyanga Penusah Bagi Menua (JPBD) Betong dalam ngatur sida ke tasah bah di Debak.
Kerejasama ke dipandangka nya ku iya udah ngemuntangka semua pengawa mindah ke sida ti tasah ngagai Palan Pengenduh Sementara (PPS).
