BINTULU, 20 Jan: Semua peminta ti ngaul Projek Mit Menua Pesisir (MRP) di sitak Kunsil Nengeri (DUN) Kakus deka diserenih dulu dikena nentuka semua sida ke bisi minta projek bela nerima bantu ti diungkupka perintah nengeri.
Menteri ba Opis Premier Sarawak, Dato Sri John Sikie Tayai nyemetak madahka raban ke bedau bulih tauka endang begunaka bantu MRP deka diberi dulu.
Iya madahka semua genturung pendiau enggau rumah panjai sigi deka diberi mrp nengah chara begintir awakka semua orang bela ngasaika diri nadai dikelaung.
“Semua peminta MRP ke dianjung, sigi diserenih aku dulu ngambika ngemudahka aku ngelala ni bagi rumah panjai tauka genturung pendiau ke udah tauka bedau nerima bantu tu.
“Ambika chunto ti sida udah nerima bantu nya taun 2023, taun 2024 tu gintir orang bukai ga diberi,” ku iya madah rambau Program Nyerahka Chek MRP DUN Kakus di Tatau lebuh Hari Lima.
Berebak enggau nya, John Sikie ke mega Kaban Kunsil Nengeri (ADUN) Kakus nerangka MRP deka diberi dulu ngagai sida ti ngaga tauka nyeruri jalai sereta benung berumah.
“Peminta ti diberatka aku iya nya sida ti deka ngaga tauka nyeruri jalai enggau benung berumah,” tandu iya.
Iya madahka, bantu ke diberi nya ulih nyaup sida ke benung berumah meli kereban ngaga rumah baka musik lalu nya mesti diatur manah nengah Komiti Pemansang enggau Pengelikun Genturung Pendiau (JKKK).
Pia mega, MRP ke diberi nya enda diberi sechara mata duit tang dikena bejalaika projek ti tau meri pengelantang ngagai semua perayat rumah panjai.
Nitihka rikod, bisi 12 penerima MRP ti ngaul gerempung, JKKK rumah panjai enggau genturung pendiau, biro indu, kelab sereta Gerempung Apai Indai enggau Pengajar (PIBG)) ti nguna kos penyampau RM267,000.
Seninjik ngulu program nyerahka MRP nya, iya bisi ngemataka pengawa nyerahka dokumen projek nyeruri diwan SK Kelawit, ngabas Projek Transformasyen Menua Pesisir (RTP) ke benung digaga ngaul jalai bisi perabung SK Tatau enggau projek palan entepan kerita Rh Sengalang, Sungai Selitut, Tatau ti udah tembu digaga. – TVS
