DEBAK, 19 Jan: Urung 100 iku raban ke tasah bah udah dipindahka ngagai Palan Pengenduh Sementara (PPS) ba Dewan Mellenia Debak Betong pengudah rumah sida kena ampuh bah kenyau tumu pagi Hari Lima.
Semua sida ke tasah nya ngaul 32 buah rumah ari tiga genturung pendiau iya nya Kampung Lalang, Kampung Bungey enggau Kampung Babu dipindahka ngagai PPS berengkah pukul 1.30 pagi.
Pengari Komiti Penyangga Penusah Ngenyit Nengeri (JPBN) Sarawak madahka, sida ke dipindahka ngaul 43 lelaki enggau 60 orang indu nyengkaum anak mit.
Sebedau tu Opis Meteorologi Malaysia (Metmalaysia) mansutka jaku tangkan gaya hari disadang deka terus ujan ba tikas bejejaga ungkup tiga nengeri nyengkaum Sarawak berengkah kemari.
Penyadi ujan nya dipelabaka ba bagi menua mua ke selatan, tengah Sarawak iya nya ba sekeda endur ba Kuching, Serian, Samarahan, Sri Aman, Betong, Sarikei, Sibu enggau Mukah.-TVS
