SPAOH, 18 Jan: Berindik ari mensia mayuh ditu ke majak begunaka perubat hemodalisis dia sebuah palan hemodialisis ke berega RM1 juta udah diperunding deka digaga di sitak Spaoh.
Sapit Premier Sarawak Datuk Amar Douglas Uggah Embas madah, pengawa ngaga palan nya udah disetuju nengah kerejasama Opis Menteri Pengerai Malaysia (KKM) enggau Ejensi Pemansang Bagi Menua Betong (BDDA).
“Sida (KKM) udah setuju bekerejasama enggau BDDA iya nya ngaga sebuah Palan Hemodialisis di Spaoh ke berega RM1 juta.
“Klinik tu majak diguna mensia mayuh di Spaoh, nyadi sehari tu pekara nya udah disetuju,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya dirandau media pengudah tembu penemuai Sapit Menteri Pengerai Malaysia, Datuk Lukanisman Awang Sauni kitu, kemari.
Kelimpah ari nya, ku terang iya KKM mega setuju nyendiaka belanja dikena meli taba Klinik Spaoh kelas empat.
Udah nya, Uggah madah KKM mega udah ngemendarka agih belanja sepenyampau RM350, 000 dikena ngemanahka agi Klinik Pengerai Spaoh.
Berebak enggau nya, Lukanisman bisi diberi basa nyerahka sebuah ambulans ngagai Klinik Spaoh sebedau bekejang ngagai Sri Aman.-TVS
