DEBAK, 18 Jan: Opis Pengerai Nengeri Sarawak (JKNS) benung ngiga palan engkeman endur ngaga Klinik Pengerai Saratok, ku Datuk Lukanisman Awang Sauni.
Sapit Menteri Pengerai Malaysia (KKM) madah, perambu ngaga klinik nya deka dibantai ba Langgur Pemansang Malaysia Lumpar Ke-13 (RMK13) nyema udah disetuju semua raban.
“Aku udah berandau enggau bala pengari rayat ditu ngambi meda taba klinik ke udah bisi laban juluk Perintah Sarawak endang deka meda genap bagi menua enggau pelilih menua bela ngembuan klinik ke menyana.
“Reti nya, ukai semina sepital tang mega patut bisi kilnik dibuka ba endur nya…di Saratok agi nadai klinik nya kebuah sepital nya nyau sekut.
“Nyadi kitai deka ngiga taba ke engkeman nengah JPNS nyema semua udah setuju kitai deka ngatur perambu dalam Langgur Pemansang Malaysia ke dudi tu,” ku iya.
Lukanisman ke mega Kaban Parlimen Sibuti madah munyi nya lebub nyaut tanya raban media bekaul enggau isu sekut ke ditapi Sepital Saratok.
Ke penerang, Sepital Saratok diatu balat sekut iya nya nerima urung 250 iku pesakit datai berubat dalam sehari.-TVS
