KUCHING, 16 Jan: Pemangku Raja Pahang Tengku Mahkota Tengku Hassanal Ibrahim Alam Shah Ibni Al-Sultan Abdullah Ri’Ayatuddin Al-Mustafa Billah Shah sehari tu tadi bisi ngatur penemuai ngagai Borneo Cultures Museum (BCM) nyerumba penemuai rasmi iya pengelama lima hari ke Kuching.
Penatai Tengku Hassanal urung pukul 1.10 ngalihari nya dikelaluka Sapit Menteri Nembiak, Lumba enggau Pemansang Orang Dagang Sarawak, Dato Gerald Rentap Jabu, Sapit Menteri Utiliti enggau Telekomunikasyen Datuk Dr Abdul Rahman Junaidi Sereta Sapit Direktor Opis Muzium Sarawak Dayang Morzanah Awang Haddy.
Maya nemuai ngagai BCM, Tengku Hassanal dibai meda ngelingi Borneo Cultures Museum seraya diberi licha ari kurator BCM Yasmin Khalid Nicholls.
Mua ke malam tu, iya ditaga ngulu Pengerami Makai Lemai begulai enggau Premier Sarawak, Datuk Patinggi Tan Sri Abang Johari Tun Openg di Pullman Kuching.
Dulu ari tu, Pemangku Raja Pahang nya mega bisi nemuai ngagai Opis Petroleum Sarawak Berhad (Petros) di Icom Square enggau Menara Sarawak Energy Berhad (SEB) ba Jalai Isthimus Kuching.-TVS
