SARATOK, 15 Jan: Kaban Kunsil Nengeri (ADUN) Krian Friday Belik muji perambu Perintah Sarawak deka numbuhka siti komiti dikena mutarka isu rejister Sistem Pangkalan Data Besai (PADU) ba menua pesisir.
Ku iya, penumbuh komiti nya chukup manah sereta dikearapka ulih mantu peranak di menua pesisir ke ngembuan penanggul nadai bungkur internet enggau kereban.
Nya alai, iya mega ngarapka enggau pemisi komiti tu ila ulih beratika pekara bukai ke diguna rayat di menua pesisir dalam ngerejister diri ba PADU.
“Kitai ngasaika komiti tu ulih mantu tebal agi ba menua pesisir ke diatu betapi enggau penanggul internet ti enda tentu (laju) ba sekeda endur sereta penanggul ke ulih dipeda kitai ari sukut kereban iya nya (nadai) komputer tauka laptop dikena ngisi PADU tu,” ku iya.
Friday mansutka jaku timbal nya maya dirandau media pengudah ngulu aum komiti pengatur Krian Nature Challenge diatur ba Opis Pelilih Saratok ditu, pagi tadi.
Empai lama, Premier Sarawak Datuk Patinggi Tan Sri Abang Johari Tun Openg madahka Perintah Sarawak deka numbuhka komiti khas dikena mantu mutarka proses ngerejister sistem PADU ba nengeri tu lebih agi di kandang menua pesisir.
Bepelasarka rikod, bisi 99,145 iku rayat Sarawak udah berejister dalam sistem PADU naka 11 Januari tu tadi.-TVS
