SRI AMAN, 14 Jan: Rayat di pelilih Engkilili deka ngasaika empas pemansang nengah agih belanja beungkus urung RM641.78 juta dikena ngemujurka projek infrastruktur ba sitak nya.
Sapit Premier Sarawak, Datuk Amar Douglas Uggah Embas madah, semua projek nya diatu agi dalam proses ngatur tusun pengawa nyengkaum proses tinda ti deka dipejalaika ba taun tu.
“Projek keterubah iya nya Bukong Bypass Engkilili Kampung Bulu Lubok Antu beungkus RM39.5 juta.
“Projek Jalai Sebeliau-Nanga Entalau Sri Aman beungkus RM68 juta utai tu deka ditinda taun tu.
“Udah nya, Jalai Sebeliau- Bilararap beungkus RM228 juta, nyadi tu agih ari Kuala Lumpur din nganti tinda ari nyin.
“Pia mega, Projek Ngaga Jalai Sri Aman Lidong Sri Aman beungkus RM63 juta.
“Jalai Ulu Skrang, Lubok Antu Fasa II, tujuh jematan RM28.5 juta di Skrang, ngemanah Jalai Ulu Skrang beungkus RM300 juta dibaruh kemata Opis Menteri Pemansang Genturung Pendiau enggau Wilayah,” ku iya.
Iya mansutka rintai projek nya rambau bejaku nutup Program Penyerakup GPS Engkilili ba Diwan Mayuhguna Kaunsil Pelilih Lubok Antu di Engkilili lebuh Hari Enam.
Nangkan ke nya, Uggah mega madah projek bukai baka Projek Ngaga Jematan Batang Ai-Merebung nuju (Pasar Engkilili) beungkus RM40 juta.
Pia mega ngaga Projek Jematan Konkrit Nanga Entalau,Ulu Skrang beungkus RM5.7 juta benung diperambu.
Udah nya, ku Uggah Projek Ngaga Jematan Konkrit dikena ngelayang Batang Ai Engkelili beungkus RM16.5 juta ditangkan projek ke bukai.
Nya alai, ku terang Uggah nya mih pemayuh pemansang ke diulih sekumbang Kaban Parlimen GPS bisi pengari di menua.
Uggah madah, rayat di Engkilili patut beratika pemansang enggau nemu bagi sapa ti ulih mai pemansang ngagai sitak sida udah tu.
“Ditu laban chalun kitai GPS menang bepilih parlimen tu tadi kitai enda ngira majoriti.
“Asal kitai (GPS) udah menang, menang mih nya. Nya alai, laban kitai menang kitai untung laban kitai bisi pengari duduk enggau orang ngambi sama-sama untung sempama baka bulih ‘ikan semah, ikan empurau’ ke diberi orang ninting taun,” ku iya.
Sama bisi datai Sapit Premier Sarawak, Datuk Amar Dr Sim Kui Hian, Menteri Pengangkut Sarawak, Dato Sri Lee Kim Shin, Sapit Menteri Pengerai Mensia Mayuh, Pengawa Berumah enggau Perintah Lokal Sarawak, Datuk Michael Tiang Ming Tee sereta Kaban Parlimen Lubok Antu Roy Angau Gingkoi.-TVS
