SPAOH, 12 Jan: Sapit Premier Sarawak, Datuk Amar Douglas Uggah Embas nyemetak madahka semua projek perintah di menua tu patut tembu nitihka timpuh ke udah ditetapka.
Ku iya madah, nya beguna bendar dikena nyeliahka rayat lebu nganti tauka penembu projek ke udah dikemendar nyau dilanjar baru ngagai taun bukai.
“Kitai udah meda, ukai semua projek dikemendarka ba taun nya ulih tembu ba taun ke sama lalu dibai ngagai taun baru.
“Ambika chunto ba taun 2023 ba Bukit Saban kitai bisi 25 iti projek ke patut tembu ba taun nya. Tang, tejanggal ngujungka dibai ngagai taun tu 2024,” ku iya.
Iya mansutka jaku nya lebuh dirandau media pengudah tembu aum enggau bala Tuai Ejensi Perintah enggau bala Tuai Rumah ba Bilik Aum Opis Pelilih Mit Spaoh lebuh Hari Empat.
Nangkan ke nya, ku Uggah rayat lebuh sida nemu siti-siti projek nya udah dikemendarka sida endang ngandalka projek nya tembu nitihka ditimpuh.
“Pia mega bala pengari rayat lebuh sida ngemendarka projek, sida mega ngarapka projek nya ulih tembu ba taun nya,” ku iya.
Nya alai, Uggah ke mega Menteri Infrastruktur enggau Pemansang Penyangkai Kapal Sarawak nerangka, berengkah ari taun 2024 tu ungkup sitak Bukit Saban semua projek perintah lebih agi Projek Transformasyen Menua Pesisir (RTP) enda tau enda tembu nitihka timpuh.
“Aku udah berandau enggau Residen, JKR, Kaunsil Pelilih sereta DID ke nyadi ejensi pematau (projek) ungkup taun 2024.
“Kitai deka semua projek ba taun 2024 mesti tembu sebedau abis taun 2024,” ku iya.
Ku terang Uggah, ungkup sitak Bukit Saban bisi RM5 juta agih RTP.
Udah nya ditambah RM800,000 agi belanja dibaruh Parlimen ditangkan agih RM700,000 Projek Mesra Rayat lalu enti semua nya dipegulai deka manggai RM6.5 juta ungkup Bukit Saban aja.
Beduduk ari nya, ku iya raban pengari rayat di menua nya deka meda genap projek ti diperambu ba taun 2024 ulih tembu enggau nadai penanggul.-TVS
