KUALA LUMPUR, 11 Jan: Opis Menteri Penyerakup Menua deka nyiri 50 Duta Penyerakup enggau dua Ikon Penyerakup ninting taun, berengkah taun tu.
Menteri Penyerakup Menua, Datuk Aaron Ago Dagang madah, tanggungpengawa sida iya nya ngerembaika penemu, pemereti ati enggau pengawa perintah dalam narak semangat kemerah enggau segulai sejalai.
”Kitai deka nambahka agi siti agi ejensi dibaruh kitai iya nya Yayasan Volunteer Siswa. Sida tu datai ari raban graduet, graduet di menua kitai tu.
“Apin lama kitai bisi nganjung 90 iku raban graduet ke nengeri Sarawak dalam lapan raban awakka sida idup begulai enggau raban etnik di menua pesisir lalu meretika daya idup, adat enggau ulah rayat kitai di Sarawak.
Kitai deka ngatur tu baru ba Sabah enggau selampur menua ngambika sepengudah abis program tu, kitai ulih nyiri sida nyadi ambassador, duta,” ku iya.
Iya madah munyi nya pengudah bejadika Pengerami Nyuaka Anugerah My Hero 4.0 Taun 2024 ba ditu, sehari tu tadi.
Tuju besai bejalaika inisiatif tu iya nya dikena nambahka pengelandik enggau penemu raban nembiak awak nyadi ketuai penyerakup enggau pengelikun dalam komuniti sida.
Nengah empat bidang ke dikemerat, penyerakup nengah volunteer, meretika Rukun Negara, negapka penyerakup menua enggau nyaga pesaka menua.-TVS
