SARIKEI, 10 Jan: Projek ngaga Jalai Pasi-Tanjung Manis bejalai enggau lanchar enggau ditaga tembu bulan September taun tu.
Sapit Menteri Pengatur Mengeri, Tanah enggau Rampa Menua Sarawak, Datuk Len Talif Salleh madahka, projek ke beungkus RM321 juta tu dipelanja penuh perintah Sarawak ungkup pengelantang rayat ba kandang endur nya.
Ku iya, projek jalai Pasi-Tanjung Manis tu ngembuan pemanjai 17 kilometer nyengkaum jematan ngelayang Sungai Batang Rajang pemanjai 1.2 kilometer.
“Projek dipelanja penuh perintah Sarawak ke beungkus RM321 juta tu, sepanjai 17 kilometer nyengkaum jematan meraka Sungai Batang Rajang sepanjai 1.2 kilometer dijangka tembu bulan September 2024,”ku iya.
Len mansutka jaku nya nengah laman Facebook iya pengudah ngabas pemansang pejalai Projek Jalai Pasi-Tanjung Manis kena Hari Dua.
Iya ke mega Kaban Kunsil Nengeri (ADUN) Kuala Rajang neruska pengawa ngabas pemansang projek astaka di kampung selalang ke beungkus RM300, 000 ke mega ba baruh Projek Transformasyen Menua Pesisir (RTP) 2023.
Berindik ari nya, iya ngarap kededua projek ti digaga di sitak DUN Kuala Rajang nya ulih bejalai enggau lanchar sereta meri pemaik ngagai rayat.-TVS
