KUCHING, 8 Jan: Inisiatif perintah Sarawak ba baruh iring Premier Sarawak, Datuk Patinggi Tan Sri Abang Johari Tun Openg udah mayuh meri ubah sereta meri empas positif ngagai pengidup rayat Sarawak.
Lebuh dirandau pemberita TVS, mensia mayuh bela madahka pengaga ati diri bekaul enggau inisiatif ti dipejalaika Abang Johari dalam ngemansang enggau nyaga pengelantang rayat nengeri tu nyengenda dipeda lalu nadai siku rayat dikelaung ari nerima bantu.
Ku siku Pedagang Krafjari, Sophia Brodie, 51 taun ari Siburan, inisiatif bejalaika pakej Bantu Khas Sarawakku Sayang (BKSS) mantu ngelempungka tating rayat enggau mulaika pemanah sosioekonomi rayat ti tekeruga berindik ari pengelekai Covid-19.
Iya nambah, geran khas BKSS 6.0 RM1500 ungkup pedaja enggau pedagang mit taja enda besai tang chukup dikena mantu raban pedagang ti tekeruga penatai pemisi.
“Ba aku chukup manah subsidi karan laban ulih ngelempungka belanja kitai mayar ke benung dalam Atur Mindah Betagang (PKP) maya nya.
“Mayuh orang nadai gawa nyengkaum aku putus pengawa maya nya tang aku lantang ati laban bisi bantu ari perintah baka aku ti ngaga krafjari.
“Taja pan enda besai tang tulung ungkup kami pedagang mit sepenyampau RM1500 nya chukup besai reti.
“Nama kebuah chukup mayuh laban ulih dikena aku meli utai dikena ngaga marik mimit-mimit taja maya nya rega bedau tinggi dibanding diatu lalu RM1500 nya enda chukup tang maya nya suba bantu RM1500 nya sigi chukup nangkup guna,” ku iya.
Udah nya, siku indu gawa rumah, Julia Brodie madah, bantu diskaun bil karan 5 peratus nyentuk 25 peratus siti singkang ke manah dalam mantu rayat.
“Kitai minta Premier kitai ngembuan ati ti manah enggau semua rayat iya ulih nulung kitai neruska mantu meri diskaun subsidi bil karan, ai enggau meri bantu ngagai orang dagang ti begunaka puku kena ngepunka pengawa dagang.
“Ngelama tu, bil karan kitai mayar tang pengudah bisi diskaun nya ngelempungka tating belanja kitai, ” ku iya.
Nangkanka nya, Pengajar Orang Deriba ba Institut Memandu (MKM), Jerry Samuel madahka, pengelekai Covid-19 meri pangka ke besai ngagai raban sida laban mayuh premis ditutup ketegal PKP tang pengudah bisi bantu bantu RM500 ungkup servis e-hailing enggau pengajar orang deriba meri pemaik ngagai sida.
“Pengudah Covid-19, penatai pemisi kami semua kusut laban maya nya ujung taun laban enti orang bisi belajar, penatai pemisi kami tadi ba dia aja, enti nadai orang belajar deriba, nadai penatai pemisi mih kami.
“Maya nya mega Abang Johari madahka bantu BKSS nya tadi, chukup lantang ati. RM500 pan chukup asal bisi kena nyukung mimit penatai pemisi kitai ke udah nadai nya,” ku iya.
Berindik ari nya iya arap bendar bantu ungkup sektor pengangkut baka pengajar orang deriba jemah bisi ditambah tauka diberi bantu ba taun ti deka datai.
Jensen Inggang ke gawa ba sektor peribit pechaya deka mayuh agi pemujur enggau pemansang dibai perintah Sarawak ba baruh iring Premier Sarawak, Datuk Patinggi Tan Sri Abang Johari Tun Openg pengudah tu ila.
Ambika banding ku iya, siti pengelebih perintah Sarawak dalam nyaga pengelantang raban indai iya nya nyendiaka Bantu Indai Beranak (BIB) ti nadai digaga ba nengeri bukai.
“Laban ngasai siku ari penerima bantu nya lebih agi maya bujang endang ngelempungka belanja kitai mimit laban kitai nemu kitai maya nya suba endang mayuh orang nadai kereja sereta bedau chukup belanja.
“Lak ke taun baru ti deka datai, kitai nemu pemar ba taun baru tu endang mayuh agi, aku pechaya Premier Sarawak, Abang Johari, iya nemu semua rayat Sarawak tu patut dibantu kelebih agi sida ti kurang penatai pemisi.
“Aku chukup gaga entara siku ari rayat Sarawak, arap utai tu terus dimaju enggau dipejalaika ba taun ti deka datai,” ku iya.-TVS
