SARATOK, 8 Jan: Bemacham inisiatif dipejalaika Premier Sarawak Datuk Patinggi Tan Sri Abang Johari Tun Openg sekumbang tujuh taun udah dichiri nyadi premier nerima puji ari rayat Sarawak.
Siku Tauke Kedai Makai di Debak, Yusri Haji Tambi madah, asil ari inisiatif ke dipejalaika perintah Sarawak nyata mantu ngelempungka tating belanja rayat lebih agi raban pedagang mit baka nengah Bantu Khas Sarawakku Sayang (BKSS).
“Aku siku orang dagang mit nyadi nadai lebih ari bantu BKSS chukup manah dipeda aku.
“Nyadi arapka bantu nya ulih terus dipejalaika laban nengah bantu nya ulih mantu kami ba sukut bayar suwa kedai enggau puku dikena bedagang,” ku iya.
Udah nya, sama bisi mansutka buah penemu siku Tauke Pekayan enggau Kereban Penganta, Tina Akau 42 taun madah, taja iya nadai nerima bantu puku bedagang tang iya tetap meri terima kasih ngagai perintah nengeri laban nengah BKSS iya ampit ngasaika pengelantang ari bantu diskaun bil karan enggau ai.
“Baka ditemu aku mayuh inisiatif udah diberi iya (Premier) ari BKSS chunto bantu orang dagang mit, diskaun bil eletrik enggau ai.
“Kelimpah ari nya bisi bantu ungkup orang beranak nyadi aku laban ke nyadi pedagang mit berasai gaga laban ngasaika tempias bantu tu.
“Kitai sama nemu bil ai enggau bil elektrik tu endang sigi semampai dikena (dibayar) kitai besehari-hari.
“Nya kebuah enggau chara bisi inisiatif bantu baka tu iya chukup manah laban ulih ngelempungka belanja tiap bulan,” ku iya.
Nangkan ke nya, Tina ngarapka inisiatif BKSS tu terus ditampung ungkup pengelantang rayat lebih agi di menua pesisir.
Seduai iya mansutka buah penemu nya maya dipinta pengari TVS Saratok bekunsi ke sekeda pemujur ke udah dipejalaika Perintah Sarawak dibaruh iring Premier Sarawak Datuk Patinggi Tan Sri Abang Johari Tun Openg.
Ke penerang, naka tu bisi semilan pakej BKSS udah mujur dipejalaika Perintah Sarawak
dikena ngintu enggau nentuka pengelantang rayat di nengeri tu.-TVS
