SARATOK, 8 Jan: Penanggul sekut diwan endur ngatur pengerami ke besai ngujungka bala ketuai perintah Gabungan Parti Sarawak (GPS) di Saratok berunding lalu setuju merambu ngaga sebuah diwan baru ke lantang alai ngatur sesebengkah pengerami besai.
Kaban Kunsil Nengeri (ADUN) Krian Friday Belik madah, diatu sida udah nyendiaka agih belanja dibaruh Ejensi Pemansang Bagi Menua Betong (BDDA) sepenyampau RM15 juta dikena digaga diwan baru nya lalu diatu semina nganti milih taba ke nemban.
“Kitai merambu deka ngaga siti diwan baru ba Saratok laban naka ke diatu diwan ke bisi ditu (Saratok) enda muat alai gempuru besai.
“Nya alai kitai merambu ngaga siti diwan baru lalu diatu benung ngiga palan ke nemban,” ku iya.
Friday madah munyi nya maya dirandau media pengudah ngulu sebengkah pengerami diatur Kaunsil Dagang enggau Industri China Pampang Saratok ba Diwan Sri Krian kena Hari Enam.
Ku tandu Friday, penembu diwan besai nya ila chukup beguna laban ukai semina ulih nyadi palan begempuru tang mega deka endur ngatur bemacham program baka eksibisyen krafjari, galeri enggau ke bukai.
“Arapka nengah penembu diwan nya ila ukai semina ulih endur ngatur gempuru besai tang ulih mega alai ngatur eksibisyen, aum besai, galeri sereta mandangka krafjari ari Saratok.
“Nya alai kitai ngarapka agih ke diberi nengah BDDA chukup dikena ngaga diwan tu ba rengat terubah laban kitai mega merambu deka nyambung projek tu ba rengat ke-2 ngambika diwan tu ngembuan perengkaguna ke menyana,” ku iya.-TVS
