SARATOK, 7 Jan: Presiden Kaunsil Dagang enggau Industri China Sarawak, Kong Chiong Ung berasai temegah laban komuniti Tiong Hua di Saratok taja enda mayuh tang ngembuan tanggungpengawa ke besai dalam ngangkatka ekonomi mengeri mit di menua pesisir.
Berebak enggau nya, Kong madah pengawa ke digaga Kaunsil Dagang enggau Industri China Sarawak pampang Saratok mega diaku perintah enggau mensia mayuh.
“Kitai (China) ditu enda mayuh urung 6 peratus aja ari 20, 000 semua penyampau perayat ti bisi di Saratok tang ulih sama ngambi bagi enggau manah dalam genap aktiviti ekonomi pelilih mit ba menua pesisir.
“Pia mega, pengawa Kaunsil Dagang enggau Industri China Sarawak pampang Saratok mega udah diaku perintah enggau komuniti China ditu (Saratok),” ku iya.
Kong madah munyi nya maya bejaku ba Pengawa Angkat Sumpah Kaban Komiti Ke-23 ungkup sesi 2023-2025 Kaunsil Dagang enggau Industri China Saratok ba Diwan Sri Krian, kemari.
Kelimpah ari nya, kong mega meransang komuniti Tiong Hua di Saratok anang enda enggau ngerebut peluang ke bisi disediaka perintah nengah Ejensi Pemansang Bagi Betong (BDDA).
“Chukup gaga meda perintah Sarawak meri perati nggagai pemansang penuh ba selampur Sarawak lalu di Betong bisi ditumbuhka BDDA.
“Tu deka ngelengkaska agi pemansang nyengkaum di Sarato kelimpah meri peluang ngagai raban pedagang (kunteriktor) ditu ngambi bagi ari Projek Pemansang Jalai Besai Pan Borneo.
“Diatu jalai Pan Borneo pan nyau deka tembu lalu pejalai ngagai siti-siti menua pan nyau muntang, nyadi tu siti kebuah alai pemeranak puku mega deka datai ke Saratok ngujungka mantu nyungkak daya idup enggau ekonomi rayat di Saratok,” ku iya.
Kaunsil Dagang enggau Industri China ditumbuh kenyau 40 taun ke udah berengkah taun 1978.
Nyadi taun tu nyadi taun keterubah diatur Pengawa Angkat Sumpah Nyiri Kaban Komiti Kaunsil Dagang enggau Industri China Sarawak pampang Saratok.-TVS
