SARATOK, 7 Jan: Agih belanja urung RM38 juta udah dikemendar perintah nengeri dikena ngaga jalai puntang ari Rumah Panjai Senyawan meraka Sungai Awik lalu rembus ke Taman Muhibbah di Pasar Saratok.
Kaban Kunsil Nengeri (ADUN) Kalaka Mohd Duri madah, projek sepanjai 2 kilometer nya diatu deka berengkah enda lama agi ke alai diatu benung dalam proses nyiri juruperunding projek.
“Ba rintai projek Ejensi Pemansang Bagi Betong kitai udah merambu ngaga siti jalai entara Rumah Panjai Senyawan meraka Sungai Awik lalu terus ke Taman Muhibbah.
“Projek tu udah bulih pemendar ari Chairman BDDA lalu ngarapka perambu tu ulih bejalai enggau mujur lalu diatu benung dalam proses ngelantik juruperunding,”ku iya.
Iya madah munyi nya lebuh dipinta ngelansa pasal perambu ngaga jalai puntang ari Senyawan ke Saratok dibaruh BDDA pengudah tembu ngulu sebengkah pengerami ba ditu, kemari.
Ku tandu Mohd Duri penembu projek jalai nya ila deka meri empas besai ngagai sosio-ekonomi lebih agi ba bidang betanam betupi di Saratok.
“Tuju jalai tu digaga ngambika nyadi jalai kebun lalu ngemuntangka pejalai mensia mayuh lebih agi mensia mayuh ke nguan rumah panjai ba sitak Senyawan, Sungai Antu enggau Temudok mai asil kebun sida ke Saratok.
“Kelimpah ari nya, ngemuntangka sida bejalaika aktiviti bukai baka ngelawa opis perintah enggau sepital ba Saratok.
“Jalai tu enda panjai iya nya urung 2 kilometer aja tang ulih ngemandakka timpuh pejalai sida,” ku terang iya.-TVS
