SARATOK, 3 Jan: Kaban Kunsil Nengeri (ADUN) Krian Friday Belik muji komitmen dipandangka raban komuniti Tiong Hua dalam mantu pemansang di pelilih Saratok lalu sida dikearapka terus ngiring raban Bumiputera di pelilih nya ke bisi mekuhka pengawa dagang.
Ku Friday, dibaruh pemansang ke udah dilanggur Ejensi Pemansang Bagi Betong (BDDA) mayuh projek ke ulih dikemansang nengah kerejasama enggau raban Bumiputera sereta tau meri penguntung ngagai kededua raban nya.
“Terima kasih ngagai pengawa enggau komitmen ke udah dipandangka komuniti Tiong Hua ditu mantu ngemansangja pelilih Saratok.
“Kitai mega ngarapka sida ulih mantu bakih sida ari Bumiputera bukai dalam ngemajuka diri ba sektor ekonomi enggau dagang,” ku iya.
Friday madah munyi nya lebuh dirandau pengari TVS pengudah ngulu Pengawa Angkat Sumpah Kaban Komiti Ke-23 ungkup sesi 2023-2025 Kaunsil Dagang enggau Industri China Saratok ba Diwan Sri Krian, kemari.
Ku terang Friday, mayuh pemansang deka digaga perintah nengah BDDA lalu arapka raban Bumiputera enggau komuniti China bela bekerejasama ngambi bagi dikena ngelengkaska agi pemansang lebih agi di Saratok.
“Tu ngambika kitai ulih ngasilka siti gaya dikumbai ‘win-win situation’ antara Bumiputera enggau komuniti China bela bekerejasama dikena ngerichahka agi pemansang di Saratok,” ku iya.-TVS
