KUCHING, 6 Jan: Rikod Turu Pengibun Saham Sarawak (ASSAR) sekumbang udah diubah baru kenyau ari 21 Oktober 2022 mujur ngagihka RM11.71 juta dividen pengudah semilan taun nadai terima dividen.
Ku Premier Sarawak, Datuk Patinggi Tan Sri Abang Johari Tun Openg, pengawa meri dividen interim 2.5 sen seunit nya ngagai 57,613 pemeranak puku ungkup rikod wang taun kepenudi ti deka abis timpuh kena 30 June 2024, dikira bepelasarka laluh penyampau unit ke dipenggi naka 31 Disember 2023.
Abang Johari taja pia madah pengawa meri dividen nya bepelasarka untung ungkup timpuh enam bulan keterubah rikod wang sepanjai taun.
“Pekara tu chukup meransang laban Turu ASSAR lepas-ubah semina ulih diperanakka penuh kena Julai 2023.
“Arapka rikod enam bulan ke deka datai mega manah. Tentu agih iya mega abis nadai pan sama mih. Pengawa meri (dividen) keterubah sepengudah-ubah baru ASSAR tu, sepengudah semilan taun nadai dividen deka ngaul pengawa meri agih sepenyampau RM11.71 juta ungkup 57,613 pemeranak puku,” ku iya.
Iya madah munyi nya ba pengawa mantaika penyampau dividen interim Pengibun Saham Sarawak (ASSAR) ba Palan Program Hikmah Exchange, kemari.
Lebuh nerang silik, ku iya, maya ngambi pangku pengawa nyadi Kepala Menteri Sarawak sebedau ditukar nama ngagai Premier Sarawak, ASSAR entara pekara diperambu deka diubah baru.
Entara atur beranakka puku ASSAR sepengudah diubah baru iya nya ngubah nisbah puku ngagai instrumen tetap ti meri untung ke lebih meruan.
“Raban kaunsil direktor udah ba renggat asa, tang aku madah anang guai. Tentu bisi chara mutarka pekara tu.
“Puji Tuhan, nengah atur ngubah baru ASSAR, sehari tu kitai ulih meri dividen ngagai semua,” ku terang iya.
Berebak enggau nya, Abang Johari andal untung nya deka terus meruan bekau ari penau Sarawak ke nyadi wilayah pengerandang kuasa gadung.
Bepelasarka langkar tugung reta enggau strategi baru ASSAR, abis nadai 70 peratus ari reta assar endang ungkup puku sekuriti bepenatai pemisi tetap, instrumen makit wang enggau deposit.
Udah nya maksimum 30 peratus ungkup puku dalam makit ekuiti.-TVS
