KUALA LUMPUR, 6 Jan: Sapit Menteri Besai ke mega Presiden UMNO Datuk Seri Dr Ahmad Zahid Hamidi ngelalau tuai parti penyakal ngetu nguji ‘nebuk atap’ (numbangka perintah) laban ulah ke baka nya semina masau jam rayat, sereta meri pangka ngagai menua enggau ngeruga penegap politik.
“Raban penyakal chukup mih ngereja sebarang atur ke enda patut.
“Anang masau jam rayat…anang masau jam minta perening rayat ari ti ngasaika asil projek sereta perambu ke udah ditusun perintah Madani tu.
“Kitai ngembuan timpuh empat taun tu, kitai begulai ngangkatka baru menua ke udah rusak pengelama sepenggal lebuh pegai tiga Menteri Besai tang nadai sebarang asil ke manah ungkup rayat maya nya,” ku iya nengah sebengkah program randau pengudah bejadika Wacana Strategi Opis Menteri Pelajar Tinggi ba Palan Dagang Dunya Kuala Lumpur, kemari.
Iya mega madah taja politik dinamik tang rayat deka ke penegap politik dikena nyungkak pengerembai ekonomi menua.
Dr Ahmad Zahid meri timbal munyi nya bekau ari penerang dipansutka Menteri Besai Kedah, Datuk Seri Muhammad Sanusi Md Nor ke ngenuku bisi perambu Perikatan Nasional nguji numbangka Perintah Besai dibaruh iring Menteri Besai Datuk Seri Anwar Ibrahim, dikumbai ‘Langkah Dubai’.
Langkah Dubai iya nya bepelasarka penerang dibantaika Sapit Tuai Direktor (Komunikasyen Komuniti) Opis Komunikasyen Komuniti (J-Kom) Datuk Ismail Yusop kena Hari Enam ke udah, madah bisi sebengkah perambu dipejalaika deka nguji numbangka perintah maya kemisi raban tuai penyakal enggau sekeda tuai ari perintah di mengeri Emiriah Arab Bersatu (UAE) empai lama.
Dr Ahmad Zahid udah nya nyemetak madahka ‘surat sumpah’ nadai agi sah dikena bejalaika ulah ‘nebuk atap’ laban udah bisi Akta Anti Lompat Parti tauka Akta Perlembagaan (Pindaan) (No. 3) 2022 (Akta A1663).
“Diatu pemutus besai mesti digaga parti enti deka pansut tauka ngalih (betukar sukung), iya mesti digaga sechara en bloc (1001) lalu tu enda nyadi ngapa laban assurance enggau jamin udah dipansutka Premier Sarawak empu ke nyadi tuai GPS.
“Kitai mega andal GRS di Sabah mega sida kiruh nyangka ungkup Pengawa Bepilih Besai Nengeri, nyadi utai ke nyadi ba renggat nasional nadai berat ba sida ke mega deka negapka Perintah Nengeri,” ku iya.
Akta Perlembagaan (Pindaan) (No. 3) 2022, ngundan penerang nagang Kaban Parlimen betukar parti, berengkah 5 Oktober 2022 pengudah akta nya dikemendarka Dewan Rayat kena 28 Julai taun ke sama.-TVS
