SARATOK, 1 Jan: Pengerami Nyambut Taun Baru 2024 ditu malam tadi chukup richah beduduk ari sukung rayat ke diau besemak nyengkaum sida ari luar Saratok.
Kaban kunsil Nengeri (ADUN) Krian Friday Belik madah, temuai ke datai ngulu pengerami nya ukai semina ari Saratok aja tang mega nyengkaum ari Debak, Pusa, Roban enggau Kabong.
Nya alai, ku Friday tuju kebendar ngintu pengerami endang dikena ngedut kaul antara rayat pupu bansa ke bisi ba Saratok kelimpah dikena mantu nyungkak penatai pemisi komuniti ti ngemeranka pengawa dagang.
“Kelimpah dikena narak enggau pemereti ati mensia mayuh lebih agi ari sukut kaul.
“Tuju program tu mega siti peluang ke manah ngagai orang dagang mit ngambika sida ulih neruska aktiviti sida lalu abis nadai tu ulih nyadika palan dikena sida nambah ke agi penatai pemisi diri,” ku iya.
Iya madah munyi nya rambau Pengerami Nyambut Taun Baru 2024 di Saratok diatur Kaunsil Pelilih Saratok (MDS) bepalan ba Pangau Besai Sri Kalaka di Saratok lebuh Hari Minggu.
Dipelabaka urung 3, 000 iku mensia datai ngulu program malam nya seraya dirichahka mayuh macham aktiviti nyengkaum panggau pemerindang sereta mayuh agi aktiviti ke bukai.-TVS
