KUCHING, 31 Dis: Indu Opis Polis Pelilih (IPD) Kuching udah bejalaika pengawa nutup lapan batang jalai beserimbai enggau Pengerami Nyambut Taun Baru 2024 ke diatur ba Waterfront Kuching.
Sapit Kepala Polis Pelilih Kuching, Superintendan Merbin Lisa nengah sebengkah penerang kemari madahka, lapan batang jalai ke ditutup tu iya nya Jalai Gambir, Jalai Lebuh Java, sepanjai Jalai Lebuh Wayang nuju ke Jalai Main Baazar.
Kelimpah ari nya, pengawa nutup jalai mega nyengkaum lampu trafik Jalai Main Baazar, Jalai Temple, Jalai Wayang, Jalai Tun Abang Haji Openg nuju ke Jalai Barrack enggau jalai masuk ari Jalai Tun Haji Openg tauka Jalai Pearl Rembus ke Jalai Wawasan.
“Renggat keterubah pengawa nutup enggau nyelawitka jalai deka diatur berengkah pukul 7 pagi mungkur Jalai Gambir enggau Jalai Lebuh Java.
“Renggat kedua deka digaga pukul 4 lemai mungkur pengawa nutup lapan jalai nyentuk pengerami tembu,” ku iya.
Nya alai, iya nesau mensia mayuh anang paking kerita ba tisi jalai ngambika enda ngachau pejalai trafik.
Tandu iya, enam kandang endur ke udah diungkup alai engkah kerita iya nya Medan Pelita, Dewan Suarah, Sarawak Plaza, Begunan Utc, Plaza Aurora, enggau Reservoir Park.-TVS
