SARATOK, 30 Dis: Kaban Kunsil Nengeri (ADUN) Krian Friday Belik madah semua 16 Projek Nyeruri Rumah Rayat Seranta (PPRMS) di sitak Krian udah tembu.
Ku iya, atur meri agih belanja projek PPRMS di Krian nadai kala ‘bepilih bulu’, asal sepintu bulih pemendar dia sekayu rumah panjai sama deka bulih bantu.
“Ba kitai di Krian ungkup taun 2022 suba bisi 6 iti projek, nyadi semua udah tembu lalu ba taun 2023 tu kitai udah bisi ngungkupka ngagai 10 buah rumah panjai ngena agih belanja RM1 juta.
“Nyadi projek nya ba Fasa 1 udah tembu magang ditangkan Fasa ke-2 ke diatu bisi ke benung digaga,” ku iya.
Iya mansutka pekara nya ngagai media pengudah Nutup Kelas Tamat Ajat Iban sereta Bejadika Serakup Indu Rumah Jimmy Sanai, Ulu Brayang ditu, kemari.
Ku terang Friday, chara bejalaika projek PPRMS ba sitak Krian bisi nyelai mimit ari sitak bukai, chunto nyema sepintu bilik rumah panjai nya bulih projek PPRMS nyadi sechara automatik sekayu rumah nya deka bulih bantu magang.
“Sistem dikena kitai ba Krian ditu enti kitai meri bisi orang minta ari rumah panjai nya dia kitai enggai nyadi ngelesit sapa ke bulih sapa ke enda laban pendiau rumah panjai lebih kurang sama.
“Nya alai nama iya bulih endang sekayu rumah nya beri kitai baka atap.
“Kitai enggai nyadi meri dua tiga pintu (aja) mesti deka diberi magang. Enti nyema rumah nya panjai nya (mayuh pintu) reti nya deka besai agi mih (ungkus),” ku iya.
Diatu ku tandu Friday raban ari Opis Palan Servis ADUN Krian benung bejalaika pengawa ngatur rintai peminta projek PPRMS di Krian ungkup taun 2024.
Projek nya ila deka dipejalaika dua renggat sereta penyampau ungkus RM500, 000 ba siti renggat.-TVS
