SARATOK, 30 Dis: Raban nembiak ari menua pesisir diperansang patut sama enggau ngerebut peluang ari inisiatif pelajar pechuma ba palan pelajar tinggi di nengeri tu ke deka dipejalaika perintah Sarawak berengkah taun 2026.
Kaban Kunsil Nengeri (ADUN) Krian Friday Belik madah, inisiatif nya siti chara dikena perintah Sarawak mantu rayat lalu ngangkatka pengelandik modal mensia di nengeri tu dudi hari.
“Tu siti chara dikena perintah Sarawak meri peluang ngagai anak Sarawak iya ke ulih masuk Universiti awak sida ulih nampung belajar ngagai ikas ke lebih tinggi.
“Tu siti peluang ke manah ngagai rayat Sarawak lebih agi bala nembiak ke benung ngiga penuduk nampung pelajar ba universiti,” ku iya.
Iya madah munyi nya lebuh meri timbal bekaul enggau inisiatif pelajar pechuma ungkup anak Sarawak ti deka dipejalaika perintah berengkah taun 2026 pengudah tembu Program Tamat Ajat Iban enggau Bejadika Serakup Indu Rumah Jimmy Sanai, Ulu Brayang ditu, kemari.
Beduduk ari nya, Friday ngarapka raban nembiak di menua pesisir enda muai peluang nya ungkup pemaik pengidup sida jemah ila.
“Nya alai, arapka anak kitai lebih agi ba menua pesisir sama ngambi peluang tu laban tu peluang ke pengabis iya manah dikena kitai ngangkatka tikas pelajar kitai.
“Enti kitai ngembuan pelajar ti tinggi kitai ulih ngubah pendiau ngubah pengidup kitai,” ku iya.
Entara Palan Pelajar Tingi (IPT) dipenggi perintah Sarawak ti disadang deka bulih pemaik ari inisiatif tu ila iya nya Swinburne University of Sarawak, Curtin University Sarawak, Universiti Teknologi Sarawak, Kolej Universiti ICATS enggau CENTEXS.-TVS
