KUCHING, 25 Dis: Sapit Premier Sarawak Datuk Amar Awang Tengah Ali Hasan nesau rayat Sarawak terut ngerapitka agi pemanah kaul enggau pangan diri kelimpah seruran betulung lebih agi ngagai raban ke kurang pemisi maya ngintu Krismas taun tu.
Nengah Pesan Krismas iya lebuh Hari Minggu, Awang Tengah ke mega Menteri Dagang Antarabangsa, Industri Enggau Pemeranak Puku Sarawak bela nesau rayat terus beserakup sereta seruran bekerejasama ngemansangka sarawak ngambika lebih maju sereta lantang.
“Maya kitai ngintu pengerami begulai enggau mayuh pupu bansa, anang enda ingatka sida ti kurang pemisi lalu terus pengawa ngabang dikena ngerapitka agi pemanah kaul,” ku iya.-TVS
