KUCHING, 25 Dis: Sarawak ditagaka bulih penatai pemisi manggai RM13.1 bilion ari taga sebedau tu maya mantaika Bajet Sarawak 2024 empai lama iya nya RM12.718 bilion.
Premier Sarawak Datuk Patinggi Tan Sri Abang Johari Tun Openg bekunsika berita manah nya pengudah berandau enggau Sekretari Pekara Wang Nengeri Sarawak minggu siti ke udah.
“Minggu nyin kemari, Sekretari Pekara Wang Nengeri Sarawak bisi meri taklimat ngagai aku pasal penyampau penatai pemisi ke nyengala diterima ungkup taun 2023 kebendar bisi ngelui mimit ari RM13 bilion.
“Penambah tu kebendar laban bisi masuk dividen ba bulan Disember lalu tu endang siti rikod ke pemadu manah diterima Sarawak,” ku iya.
Iya mansutka pekara nya maya dirandau pemberita pengudah ngulu Pengerami Rumah Tebuka Anglikan diatur ba St Thomas Catheral Parish sehari tu tadi.
Abang Johari mega madah iya melabaka ‘New Revenue Engineering’ ke dipejalaika Perintah Sarawak diatur sereta pengawa nempa undang-undang baru deka ngujungka penambah penatai pemisi nengeri.
“Aku ngarap ba dua taun ti deka datai tu deka nyadi sekeda penambah chara berenggat.
“Nya alai, aku deka meri terima kasih ngagai semua raban ke udah bejalaika tanggungpengawa diri enggau mega enda tinggal ngagai genap menteri dalam kabinet ke udah bekenanas ngemujurka perambu tu,” ku iya.
Maya aum DUN Sarawak empai lama, Abang Johari ke mega Menteri Pekara Wang enggau Ekonomi Baru mantaika bajet pemadu besai dalam sejarah Sarawak sepenyampau RM12.363 bilion ungkup 2024.
Penyampau nya mandangka penambah dibanding RM10.797 bilion ba taun 2023.-TVS
