KUCHING, 25 Dis: Presiden Serakup Pengajar Sarawak (STU) Kullin Djayang madahka gerempung nya nyambut sereta muji inisiatif Opis Pelajar Malaysia (KPM) enggau Opis Menteri Pelajar, Inovasyen enggau Pemansang Bakat (MEITD) ti udah bebendar mutarka isu suntuk pengajar di nengeri tu.
Ku iya, pekara nya berupai dipeda nengah atur KPM ke udah ngemendarka sepenyampau 1, 108 pengajar baru dianjung ngajar di nengeri tu.
“Aku ngarika STU deka meri terima kasih ngagai KPM, Opis Pelajar Nengeri Sarawak, MEITD enggau semua raban ke udah bebendar mutarka isu suntuk pengajar ba selampur menua lebih agi ba Sarawak ditu,” ku iya.
Kullin madah munyi nya lebuh dirandau pengari TVS senentang raban pengajar baru ke udah dikemendar gawa ba selampur nengeri tu empai lama.
Ku terang iya, taja penyampau pengajar baru ke dianjung nya bedau chukup tang nya dikearapka ulih ngelempungka mimit pengawa sekula ti napi penanggul suntuk pengajar ngelama tu.
“Kitai ngarapka nengah penatai bala pengajar baru tu ulih ngelempungka mimit pengawa raban sekula laban kitai sama nemu penyampau nya bedau chukup lebih agi ba matapelajar jaku etnik baka jaku Iban ke agi suntuk pengajar ba nengeri tu,” ku iya.
Nya alai, Kullin ngarapka KPM ulih ngamatka semaya diri ti dekaka anak Sarawak empu dipilih ngajar di Sarawak.
“Kitai mega beterima kasih ngagai YB Menteri Pelajar lalu kitai ngarapka iya ngamatka nama pekara ke udah disebut sebedau tu iya nya milik peranak lokal empu dianjung gawa ba Sarawak,” ku iya.-TVS
