KUCHING, 25 Dis: Perintah Sarawak komited dalam negapka agi infrastruktur pemun ba nengeri tu.
Sapit Premier Sarawak, Datuk Amar Douglas Uggah Embas madah, projek infrastruktur nya deka dipejalaika nengah agih belanja sepenyampau lebih ari RM799 juta dibaruh Bajet Sarawak 2024.
“Kelimpah ari nya, sepenyampau RM799 juta udah diagih ngagai opis menteri aku iya nya Opis Menteri Infrastruktur enggau Pemansang Penyangkai Kapal Sarawak (MIPD).
“Nyadi, kitai deka ngembuan mayuh agi jalai enggau jematan ke lebih menyana enda lama agi. Tu deka nambahka agi pemanah infrastruktur pemun kitai, nyengkaum perengkaguna pengelikun enggau akses ngelawa menua pesisir,”ku iya.
Uggah mansutka pekara nya nengah Pesan Khas Nyerumba Pengerami Krismas 2023 lebuh hari minggu.
Sebedau tu, maya bejaku nutup jurai MIPD ba Aum Kunsil Nengeri (DUN) Sarawak, Uggah madah ari agih belanja nya opis menteri iya deka bejalaika empat program infrastruktur pemun.
Nya ku iya, mungkur infrastruktur tanah ke berega RM441.755 juta, RM82.781 juta ungkup infrastruktur sungai, RM259.600 juta dikena ngemansangka begunan perintah enggau RM15.385 juta dikena ngaga begunan guna mensia mayuh.
Nya alai, ku iya pengawa beranakka puku dalam infrastruktur pemun tu endang kena perintah Sarawak komited dalam nyungkak pemansang ekonomi enggau servis perintah ba nengeri tu.-TVS
