SARATOK, 24 Dis: Bisi 350 iku ruang bilik ari raban kurang penatai pemisi enggau indai tunggal di pelilih tu nerima bakul pemakai beungkus urung RM50,000.
Kaban Kunsil Nengeri (ADUN) Krian Friday Belik ngarap bantu barang pemakai nya meri pengelantang seraya ngelempungka tating sida lebuh nyerumba pengerami Krismas.
“Arapka nengah bantu tu kita ti deka berami ngintu Hari Krismas tu tauka maya pengerami bukai baka Hari Gawai, Taun Baru China, Hari Raya bantu baka tu ulih nulung ngelempungka tating belanja kita maya musin pengerami,” ku iya.
Friday madah munyi nya rambau Program Nyuaka Bakul Pemakai diatur Gerempung Turu enggau Mulaika Pemanah Ulah Ji Yuan Shan She Saratok ba Diwan Sekula China ( SJKC) Myn Syn Saratok, kemari.
Berebak enggau nya, Friday meri puji ngagai Gerempung Turu enggau Mulaika Pemanah Ulah Ji Yuan Shan She Saratok laban udah bejalaika pengawa ti chukup manah dalam mantu raban tauka ruang bilik ti kurang pemisi.
“Nya alai kitai endang seruran ngemerat sereta meretika gaya bala kita semua lalu endang sedia deka meri bantu nya alai meri puji sereta terima kasih ngagai gerempung tu laban udah bejalaika pengawa enggau inisiatif dikena ngingat bala kitai ti kurang benasib maya pengerami serak tu,” ku tandu iya.
Ke penerang, pengawa nyuaka bantu barang pemakai rangkai baka berau, mi, bihun enggau ke bukai tu dikereja Gerempung Turu Enggau Mulaika Pemanah Ulah Ji Yuan Shan She Saratok ninting taun genap kali musin pengerami besai baka hari Krismas, Hari Gawai enggau Hari Raya.
Sama bisi datai Pegawai Pelilih Saratok Haron Mahidi, Pemancha Lim Guan Ann ke mega Chairman Gerempung Pengasih Enggau Pelajar Pemanah Ulah Ji Yuan Shan She Saratok enggau ke bukai.-TVS
