SARATOK, 22 Dis: Besermbai enggau Hari Krismas enggau Taun Baru 2024 pengari TVS bisi ngerandau sekeda pemerindang ti menua tu.
Tebal agi sida besampi minta berekat ari Petara ungkup pengelikun sereta pemujur ba taun ti deka datai.
Siku penanyi tebilang Iban, Leez Zwita meri Selamat Taun Baru ngagai kita semua ke diau ba Sarawak lalu iya ngarapka mensia mayuh lebih agi bala peminat iya tau bulih jereki ke lebih manah ba taun baru (2024).
“Aku mega deka meri Selamat Hari Natal ngagai bala kitai semua ke bisi nyambut ba taun tu lebih agi ngagai orang Sarawak bepengarap Kristian ngarapka ba taun tu kitai sama diberekat Petara,” ku iya.
Udah nya, penanyi veteran Iban Jimmy Nyaing ngarika sida sebilik meri Selamat Hari Krismas ngagai bala peminat ke agi mengkang rinduka lagu lama Iban.
“Aku arapka kita mengkang nyukung ukai semina aku aja tang patut terus nyukung bala penanyi bukai ke baru enggau ke lama.
“Enti nadai ke lama tentu nadai ke baru lalu enti nadai ke baru enda ga tau nadai ke lama.
“Nya alai sukung semua mih bala penanyi kitai Iban baik lelaki tauka indu dedini alai di Sarawak ditu,” ku iya.
Pia mega penanyi Sima Tawil enda tinggal meri Selamat Hari Krismas nuju semua bala ke megai pengarap Kristian.
“Arapka taun baru bulih berekat ke lebih belimpah lebih agi ari taun 2023. Selamat Taun Baru 2024,” ku iya.
Nangkan ke nya penanyi Lucy M mega meri Selamat Hari Krismas enggau Taun Baru nuju semua ngajihka semua Gayu Guru Lantang Senang Nguan Menua,” ku iya.
Kepenudi siku pelakun Baki Tony Endek meri Selamat Hari Krismas sereta Taun Baru 2024 ngagai semua anak Sarawak.-TVS
