SARATOK, 21 Dis: Pekit Sarawak Minecraft Championship deka terus diatur ba taun 2024 dikena narak pengerindu rebak baru ngagai bidang E-Lumba.
Menijar Kanan Tegas, Frederick Kelvin madahka pekit E-Lumba diatu udah dipasuk dalam Lumba Malaysia (SUKMA) enggau Olimpik lalu nya kebuah pekit tu pelasar ke pemadu manah endur ngansah pengelandik nembiak ke nyereta pekit nya.
“Kitai (TEGAS) mayuh perambu ba taun baru ila ke alai kitai deka neruska Pekit Sarawak Minecraft tu.
“Kitai deka matak pengerindu raban nembiak dalam bidang E-Lumba laban tu mega siti pekit ke dipekitka ba SUKMA enggau Olimpik.
“Nya alai ba aku tu ulih nyadi siti platform endur sida ngansah penau diri enggau peneleba sida dalam lumba tu,” ku iya.
Frederick madah munyi nya pengudah tembu Program Sarawak Minecraft Championship diatur ba Diwan Sri Krian ditu nyerumba pengerami Saratok New Year Countdown (SYNC) 2024 kemari.
Kelimpah ari nya, program bekaul enggau pemansang teknologi mega deka dipejalaika di menua pesisir udah tu.
Ku iya, ungkup perambu TEGAS ke bukai dia TEGAS endang semak enggau raban nembiak di menua pesisir laban kitai ngengaika sida tu tinggal lebih agi ari sukut pemansang teknologi.
“Nya alai kitai mayuh perambu deka dipejalaika ungkup sida chunto baka Program Pro Dr mega deka terus diatur ba taun baru ila.
“Kitai enggai meda sida enda nampung pelajar taja teulihka pemutus ke manah ba peresa sida laban pekara tu meri pengerugi ngagai menua kitai Sarawak,” ku terang iya.
Ngelansa pasal pekit nya, urung 500 iku nembiak ari Kuching, Sibu, Bintulu kelimpah ari Saratok empu bisi ngambi bagi ba semua tiga kategori pekit ke diatur pengelama sehari nya.
Kelimpah ari pekit Sarawak Minecraft Championship 2023 bisi dua agi pekit E-Lumba bukai ke bisi diatur maya nya baka Pekit Mobile Legends Bang Bang enggau Pekit FIFA23.-TVS
