KUALA LUMPUR, 17 Dis: Opis Menteri Dagang enggau Kos Pengidup (KPDN) melabaka musin kemisi sekula ke panjai berengkah kemari deka meransang mensia mayuh nurun bebelika barang guna ninting hari.
Nya alai, Direktor KPDN Kuala Lumpur, Ariffin Samsudin ngelalau mensia mayuh lebih agi raban ke diau ba mengeri besai bekelimat enggau belanja nengah chara ngaga banding rega ba aplikasi ‘Price Catcher’ ke dikemansangka opis menteri nya nyadi sebagi ari chara dikena ngelimat belanja sekumbang kemisi sekula.
“Aplikasi price catcher, nyadi sebedau meli kitai udah nemu rega barang tu berapa enggau ba rumah pan kitai udah ulih nemu ngaga pelin barang nama deka dibeli ke engkeman enggau bajet kitai, laban bajet tu bebida ba genap iku orang,” ku iya.
Iya madah munyi maya dirandau pengudah ngulu pengerami bejadika pengawa muka baru supermakit AEON BiG ba Kedai Besai Mid Valley Megamall, ditu kemari.
Ariffin madah, KPDN deka seruran matau rega barang ke serata menua nengah chara ngemaruka sereta ngerintaika rega barang ke pemadu baru nengah aplikasi nya ninting hari.
“Price Catcher tu dipatau ninting hari ba semua 11 sitak parlimen ba KL enggau mega ba selampur menua.
“Nyadi rega 12 tengahari, chunto pagi tu kami matau, tenghari tu endang udah pansut mih, nyadi kitai ulih ngaga banding. Amat bisi sekeda barang ba supermakit A dipeda mar, supermakit B murah mimit. Barang tu endang bebida bepelasarka pemesai supermakit nya,” ku terang iya.
Bulan Ogos tu tadi, Menteri Dagang Dalam Menua enggau Kos Pengidup, Datuk Armizan Mohd Ali madah KPDN benung ngemanah aplikasyen ‘Price Catcher’ ngambika lebih informatif enggau interaktif dikena matak mayuh agi penguna enggau ngemuntangka pengawa milih barang ke diguna.
Nengah aplikasyen tu, penguna ulih meda rega ba 1,500 premis ba serata menua ke ngudan penerang rega barang penyauh 10 kilometer (km) ungkup Semenanjung, lalu penyauh 20 km ungkup Sabah enggau Sarawak.-TVS
