KOTA SENTOSA, 17 Dis: Siku pengajar, Dines Ngau Wan bisi muka Kelas Belajar Nebah Sape ngagai barang sapa aja ti rinduka muzik tradisonal nya lalu pengawa nya diatur ba Opis Gerempung Budaya Kadazan Dusun (KDCA) Sarawak di Kota Sentosa.
Ku iya, ba sebedau iya bisi ngatur kelas nebah sape ba Union Learning Centre di Kota Samarahan tang tejanggal enda lama ketegal sekeda pengekai pandemik Covid-19.
“Aku chukup gaga amat ati laban ulih ngatur kelas Sape ba palan tu nyadi suba kami kala ngatur ba Union Learning Centre ba Samarahan tang tejanggal laban Covid nya alai kami sebuat ngetu enda lama,” ku iya.
Iya madah munyi nya pengudah tembu pengawa nyain Sempekat Pemereti Ati (MoU) antara Kota Sentosa Sape Lesson enggau Gerempung Budaya Kadazan Dusun (KDCA) Sarawak ti ngemendarka opis KDCA alai ngatur Kelas Nebah Sape udah tu ila.
Pengawa nyain MoU nya diatur kena Hari Lima tu tadi sepengudah tembu pengawa bejadika opis baru KDCA Sarawak di Kota Sentosa.
Berebak enggau nya, Dines madah kelas nebah sape nya ila tebuka ngagai semua renggat baik nya nembiak lelaki tauka indu.
Tuju iya ngambika muzik tradional Orang Ulu nya terus idup enggau ditemu semua pupu bansa.
“Kelas tu tebuka ngagai semua renggat iya nya lelaki tauka indu nyadi digelumu kami ditu.
“Barang sapa sida ke rindu nebah Sape lalu ngarapka pengawa bemain Sape tu ulih mansang maju lalu ulih dikemeranka semua bansa,” ku iya.-TVS
