SARATOK, 17 Dis: Berindik ari pengeransing deka ngenanka pesaka asal Iban dia Akademi Serakup Bansa Dayak Iban Sarawak (ASADIA) bisi ngelawa Rumah Duat, Nanga Asam di Melupa ngajar peranak rumah panjai ngaga tangu, bungai jarau enggau kain burie.
Tuai ASADIA Mabong Unggang madahka, pemujur sida ngatur kelas ngaga pesaka asal nya ba melupa berekat ari sukung belanja ari Kaban Kunsil Nengeri (ADUN) Krian, Friday Belik.
“Terima kasih ngagai YB Friday Belik udah nyaup ngatur pengawa tu nyadi arapka pengari rayat bukai mega sama-sama besaup ngangkat ngenanka main asal enggau pesaka Iban enggaika iya lenyau enti enda ditampung kitai,” ku iya.
Nya alai, Mabong ngarapka peranak rumah panjai ke bisi ngulu pengawa ASADIA tau nguna penemu nya dikena nambahka penatai pemisi sereta ngajar orang bukai.
“Arapka sida ba Rumah Duat ba Nanga Assam ditu mujur ukai semina ngaga kediri empu lalu ngambika penemu nya diajar ngagai orang bukai, pia mega kereban ke udah digaga nya tadi tau dijual awakka sida ti enda nemu (ngaga) sama bisi ngibun kereban asal bansa Iban,” ku iya.
Iya mansutka penemu nya pengudah tembu kelas ngaga pesaka asal ba Rumah Duat, Nanga Assam di Melupa ditu empai lama.
Nangkan ke nya, Tuai Rumah (TR) Duat anak Bat meri puji ngagai pengeransing raban ASADIA ke udah bebendar ngajar ngaga pesaka asal Iban ngambika enda punas sereta meruan bisi dipeda rebak dudi.
Ku iya pengawa ke udah digaga ASADIA nya chukup manah laban mayuh pengani ba rumah panjai iya empu nyau enda ingatka chara ngaga kereban pesaka Iban ke baka nya.
Nya alai, iya ngarapka penemu ke bisi diulih ba sepemanjai timpuh kelas ke diatur ASADIA ba rumah panjai iya ulih nyadika penatai pemisi tambah ungkup bala pesereta ke bisi ngambi bagi.
“Nasib bendar kitai agi ulih ngaga program baka tu ngaga perengka lama awak ke bisi kena kitai ngingatka baka ni chara kitai ngaduka perengka asal main kitai Iban baka bunga jarau.
“Asai ba aku mayuh rebak baru kami ba rumah panjai ditu diatu endang enda nemu ngaga utai tu, nyadi benasib bendar bisi peluang belajar ari sida ASADIA,” ku iya.
Ke penerang, bisi 20 iku penyereta lelaki enggau indu bisi ngambi bagi ba kelas pesaka asal ke diatur kena 9 enggau 10 Disember tu tadi.
Berebak enggau nya, siku penyereta kelas nya Siawmei Siku madahka diri chukup temegah laban ulih sama nyaup ngetanka adat enggau main pesaka lama bansa Iban.
“Tuju kami belajar ngaga manik tu awak ke pekayan bansa kitai Iban enda lenyau ba rebak baru.
“Terima kasih besai ngagai YB Friday laban iya udah nulung kami ari belanja dikena kami belajar pengawa tu.
“Terima kasih mega ngagai ASADIA laban udah nulung kami ba rumah panjai Duat Nanga Assam, Melupa Krian Saratok.
Enda tinggal enggau masuk kelas main asal nya siku nembiak ari Raban Nyelai Pendiau (OKU) Timoty anak Jemat.
Iya ngarapka nengah pengelandik ke udah diajar ASADIA, iya ulih ngasilka kereban pengelandik jari dikena nambahka penatai pemisi dudi hari.
“Nyadi aku tu orang OKU nyadi aku tu ngaga Tangu enggau Kain Burie terima kasih ngagai YB Friday Belik enggau ASADIA lalu ngarapka pengawa kami semua tu terus mujur magang,” ku iya.-TVS
