KUCHING, 16 Dis: Nembiak Dayak sekalika di mengeri tauka di menua pesisir diperansang ngambika terus ransing ngemujurka diri ba dalam bidang pelajar.
Beduduk enggau nya Sapit Premier Sarawak, Datuk Amar Douglas Uggah Embas minta Gerempung Bansa Dayak Sarawak (SDNU) bejalaika tangkup pengawa sida dalam mantu ngembing, meri sanding penemu sereta nambahka pemereti nembiak Dayak pasal guna ngemeratka pelajar ungkup pemaik pengidup dudi hari.
“Nya alai, siti bidang ke mesti dikenatika SDNU iya nya pelajar. Nengah pelajar komuniti kitai deka bulih pengelantang enggau pemansang.
“Enti nyema kitai nadai pemandai tauka pengelandik tusah deka besemekih enggau bansa bukai. Aku ngarapka nembiak Dayak bela belumba, belanda sereta beseging enggau pangan diri ngiga pemujur sereta pendiau ke menyana dalam pengidup,” ku iya madah rambau Pengerami Makai Lemai Pra Krismas Gerempung Bansa Dayak Sarawak (SDNU) lebuh malam Hari Lima.
Uggah ke mega Menteri Infrastruktur enggau Pemansang Penyangkai Kapal Sarawak ngarapka SDNU terus nyukung nembiak Dayak dalam napi bemacham pemar enggau penguji jemah.
Rambau pengerami nya mega, Uggah ngelalau komuniti ke mendam di menua pesisir mesti ngemansangka tanah sida ngambika meri asil penatai pemisi, nyengkaum ngaul diri dalam ekonomi gadung ti dikemeratka perintah baka dagang karbon ti nyadi kuing tuju ekonomi baru Sarawak.
Iya minta SDNU mantu perayat ngerumban pengawa nyukat Tanah Hak Adat Bumiputera (NCR) awakka sida ngasaika penguntung ti diulih ari sektor nya.
“Tu sigi nyadi komitmen perintah Gabungan Parti Sarawak (GPS) meri surat pala tanah ngagai rayat.
“Nya alai aku ngarapka SDNU ulih mansik pekara tu laban SDNU naka ke diatu bisi 49 pampang ti agi chakah seraya ngembuan 35, 000 iku kaban,” tandu iya.
