SPAOH, 14 Dis: Sapit Premier Sarawak, Datuk Amar Douglas Uggah Embas madahka penembu Projek Jalai Ulu Paku-Ulu Kota di Pakan chukup besai reti ngagai rayat menua pesisir lebih agi ke mendam ba tiga sitak Kunsil Nengeri (DUN) iya nya Bukit Saban, Krian enggau Pakan.
Ku iya, ba awak ke sama, pemisi infrastruktur jalai nya deka meri pengelantang ngagai peranak seraya ngemandakka agi timpuh pejalai sida ti deka mindah kin kitu.
”Kitai ngarapka sida JKR ulih meratika pejalai projek tu enggau silik lalu kami tiga pengari rayat ditu Tan Sri William Mawan, Friday enggau aku empu pan sama laban kitai ngasaika jalai tu chukup beguna.
“Kebendar penyauh jalai ty ari Jalai Pan Borneo di Betong semina 15 Kilometer aja tang diatu (ngena jalai tu deka ulih rembus) ke Saratok ari Pakan ke Ulu Paku ke Betong ngagai Sri Aman lalu ke Jematan Kedua Batang Lupar udah nya datai di Kuching.
“Nyadi tu ila deka ngemandakka timpuh pejalai mensia mayuh ditu jemah,”ku iya.
Uggah ke mega Kaban Kunsil Nengeri (ADUN) Bukit Saban madah munyi nya ngagai media rambau ngabas Projek Jalai Ulu Paku ke Ulu Kota ditu kena Hari Dua.
Udah nya, Uggah madahka Projek Jalai Ulu Paku-Ulu Kota tu mega nyengkaum ngaga jalai puntul (missing link) ba menua Ulu Grenjang sebedau tu.
“Projek tu endang nengah menua Ulu Grenjang dua iti ‘Missing Packages’ ke suba siti iya nya 6.5 Kilometer lalu pakej dua tadi enggau siti agi 4.5 Kilometer entara Ulu Budu enggau Ulu Kota udah tu (ila) semua (menua) deka besambung.
Nya alai, Uggah meri besai terima kasih ngagai perintah Gabungan Parti Sarawak (GPS) ke dibaru iring Premier Sarawak Datuk Patinggi Tan Sri Abang Johari Tun Openg laban udah ngemendarka agih dikena bejalaika Projek Jalai Ulu Paku- Ulu Kota nengah agih ba pakej kedua jalai pesisir sebedau tu.-TVS
