SPAOH, 14 Dis: Kaban Kunsil Nengeri (Adun) Pakan, Tan Sri William Mawan Ikom madah diri chukup gaga ati meda pemujur Projek Jalai Ulu Paku – Ulu Kota bejalai enggau lanchar.
Ku iya, penembu projek nya ila ulih mutarka bemacham penanggul ba ketetiga sitak Kunsil Nengeri (DUN) Bukit Saban, Krian enggau Pakan.
“Utai ke dipeda sehari tu endang ngasuh ati gagit ati laban projek tu tau dikumbai tiga dalam satu.
“Taja projek jalai tu mutarka penanggul ditu tang nyengkaum ketetiga penanggul di sitak Krian enggau Bukit Saban,” ku iya.
Iya madah munyi nya ngagai media rambau ngabas Projek Jalai Ulu Paku ke Ulu Kota ditu kena Hari Dua.
Nangkan ke nya, ku iya, projek jalai nya mega endang projek ti udah lama diranda rayat di pelilih Pakan ti keranka pemansang.
“Taja dipeda begunaka ungkus besai tang nya amat murah dibanding enggau pemar diasaika kitai.
“Nya alai chukup gaga ati sereta tentu kitai deka nemu timpuh nya ulih ditembuka. Tu endang udah lama dianti.
“Enti kitai madahka pekara ke bukai nadai tang nya udah pekara udah bisi kitai agi nganti ke diatu projek empat peratus tumu agi ari timpuh,” ku iya.-TVS
