SARATOK, 10 Dis: Mandal Presiden Parti Demokratik Progresif (PDP) Roland Duat Jubin ngelalau rayat lebih agi ba sitak Krian terus betunggang sukung ngagai pengari rayat ke nyengala dipeda ulih mai pemansang ngagai menua.
Ku iya, pengawa ke udah digaga bala tuai kelia kenyau ari pegai Kepala Menteri keterubah Tan Sri Datuk Amar Stephen Kalong Ningkan nyentuk pegai bala tuai ke diatu mesti dikeingat.
“Enti kitai meda dalam sejarah sapa ke megai kitai (Saratok) kenyau ari (Kepala Menteri keterubah) Tan Sri Datuk Amar Stephen Kalong Ningkan, Datuk Amar Dunstan Endawie Enchana, Datuk Peter Nyarok, Datuk Ali Biju nyentuk menyadi aku YB Friday Belik (diatu).
“Nya alai enti kita meda aku selalu datai kitu ke DUN Krian, Saratok laban deka besaup seraya betemu segulai sejalai laban kitai deka ngingatka pengawa digaga bala ketuai ke dulu suba,” ku iya.
Iya madah munyi nya lebuh pengawa Beserumpu JKKK sereta Ngintu Taun Ke-3 Penumbuh Serakup Indu Rumah Desmond Sungan di Kamidam Jaya, Awik Saratok ke lalu dipenyadika ADUN Krian Friday Belik, malam tadi.
Roland ke mega ADUN Meluan madah, rayat di Krian patut nemu bagi pengari rayat tauka parti politik ke ulih mai pemansang enggau pengelantang ngagai rayat.
“Kami Meluan dudi ari kita Saratok ditu.
“Nya alai kita Saratok patut nemu kuing tuju perintah (GPS) mai pemansang ngagai menua kitai ditu (Saratok).
“Kami di Meluan sereta Julau dedin belajar ari kita (Saratok),” ku iya.-TVS
