SARATOK, 10 Dis: Rayat lebih agi ba sitak Kunsil Nengeri (DUN) krian diperansang terus sepenemu enggau negapka agi sukung ngagai pengari rayat dibaruh Gabungan Parti Sarawak (GPS).
Kaban Kunsil Nengeri (ADUN) Krian Friday Belik madah, sukung tegut ari rayat di Krian ngagai GPS chukup beguna ngambika sitak Krian enda tinggal pemansang.
“Ambika chunto kitai ditu meruan bisi ungkup (agih belanja) diberi ejensi pemansang kandang menua baka BDDA.
“Nya alai enti kitai enda enggau orang ngambi bagi tauka nadai wakil ba perintah kitai tentu nadai enggau ngempu agih belanja ngemayuh nya.
“Nama kebuah laban agih belanja nya tadi ti deka dibagi ngagai siti-siti menua (DUN) enggau Parlimen nengah pengari rayat ti ngarika perintah (GPS),” ku iya.
Iya madah munyi nya maya bejadika pengerami Beserumpu JKKK sereta Ngintu Taun Ke-3 Penumbuh Serakup Indu Rumah Desmond Sungan Di Kamidam Jaya, Awik Saratok malam tadi.
Nangkan ke nya, ku Friday diatu rayat mesti segulai sejalai sebaka singkang tauka ‘seperau’ (sepenemu) laban nya deka nyadi pengering enggau peransang ngagai iya mai mayuh agi pemansang ungkup DUN Krian.
“Nya alai ngagai bala tuai rumah ngena awak tu aku mai kitai sama begempung begulai.
“Enti nyema suba baka kitai ke merau kitai enda seperau dia kitai deka tinggal dudi enda saum singkang.
“Nyadi diatu, aku mai kitai sama sesingkang saum kaki segulai sejalai sama enggau aku awak nyadika pengering sereta meransang aku ngiga belanja ke lebih dikena ngadu pemansang kitai ba Krian ditu,” ku terang iya nyemetak.
Sama bisi datai Mandal Presiden PDP Rolland Duat Jubin, Sekretari Politik Premier Sarawak Brian Fung enggau ke bukai.-TVS
