SARATOK, 9 Dis: Yayasan Tungkul Sengayuh Malaysia (NKF) Pampang Sarawak deka terus chakah ngatur program beperesa pengerai ba menua pesisir.
Pengari NKF Pampang Sarawak Nur Ezzatull Sahadah lebuh dirandau TVS madah, program nya beguna bendar dikena narak pemereti ati ngagai mensia mayuh di menua pesisir bekaul enggau pengerai tungkul sengayuh.
“Sebedau kami datai bisi sekeda pesakit tauka peranak ba rumah panjai enda nemu senentang penyakit tungkul sengayuh tu.
“Nyangka ketegal kurang bulih penerang sereta nadai program ke baka tu ngujungka mensia mayuh nadai beratka pasal pengerai tungkul sengayuh.
“Nya alai lebuh bisi licha, beperesa pengerai enggau ke bukai dia mensia mayuh deka bulih penerang ke beguna,” ku iya.
Iya madah munyi nya nyerumba Program Kempen Pemereti Ati Senentang Penyakit Denggi enggau Bomba begulai enggau pengani Rumah Panjai Dius Kusam, Kedoh Ulu di Roban empai lama.
Nangkan ke nya, ku Nur Ezzatull arapka program beperesa pengerai di menua pesisir ulih terus dikemujurka ke pemaik mensia mayuh lebih agi sida ke enda nemu diri bisi penanggul ba tungkul sengayuh.
“Aku ngarapka program baka tu ulih diatur baru dudi ila nengah Yayasan Tungkul Sengayuh.
“Program tu chuku manah dikerembai ngagai menua bukai di serata Sarawak.
“Ari pemisi program baka tu sida menua pesisir lebih agi ba rumah panjai ulih nemu tikas pengerai tungkul sengayuh diri,” ku iya.
Ke penerang, Yayasan Tungkul Sengayuh (NKF) Pampang Sarawak naka tu udah bejalaika urung 25 program beperesa pengerai ba serata Sarawak lebih agi ba menua pesisir.-TVS
