SARATOK, 9 Dis: Sebana raban pengajar Sekula Primari (SK) Temudok Awik bekaul enggau begunan sekula nya ke udah repuk nerima perati Kaban Kunsil Nengeri (ADUN) Krian Friday Belik.
Nya alai, dikena nyamin pengelikun raban pengajar enggau nembiak ba sekula nya dia Friday setuju ngagihka belanja nengah Projek Transformasyen Menua Pesisir (RTP) DUN iya dikena nyaup mutarka penanggul nya.
Ku Friday, iya deka ngagihka belanja sepenyampau RM250, 000 dikena ngaduka pengawa ke patut ba SK Temudok Awik.
“Aku udah ngungkupka RTP sepenyampau RM250,000. Nya alai, aku nyerahka ngagai piak sekula kerejasama enggau piak JKR beratika ni bagi utai ke deka diaduka dulu ngena ungkus belanja nya.
“Pekara tu enda tau enda diadu laban genap sekula enti begunan nya enda meruan dia iya deka ngeruga sistem belajar enggau ngajar ba sekula,” ku iya.
Iya madah munyi nya lebuh dirandau pemberita sepengudah tembu Program Randau ke diatur Sekula Primari (SK) Temudok Awik ba diwan sekula nya empai lama.
Nangkan ke nya, ku Friday ari ekosistem belajar ke nadai pengelikun dia pekara nya deka ngemuntanka bala nembiak ti belajar.
“Nya alai, ari sukut pengelantang sigi nadai (nembiak berasai nangi). Nyadi udah tu ila aku naka ulih ngiga belanja dikena mantu nyeruri lalu ngubah sereta ngemanah agi sekeda begunan ke patut diadu enggau lengkas,” ku iya.
Sama bisi datai Kepala Pengajar SK Temudok Awik James Lima, Tuai Pengatur Bilik Kelas Opis Pelajar Pelilih (PPD) Saratok Mohamad Mohaldin Jiren, bala tuai raban bansa enggau ke bukai.-TVS
