ROBAN, 7 Dis: Urung lapan iti projek beungkus RM100 juta di Krian udah dikemendar nengah belanja dibaruh Ejensi Pemansang Bagi Betong (BDDA) Lumpar Keterubah.
Kaban Kunsil Nengeri (ADUN) Krian Friday Belik madah semua ungkus nya mungkur pengawa ngemanah jalai lama.
“Ba kitai di Krian ungkup lumpar keterubah aku udah ngungkupka RM100 juta dikena ngemujurka lapan iti projek ba Krian.
“Nyadi mayuh agi projek nya tadi ngaul pengawa ngemanahka jalai lama,” ku iya.
Iya mansutka pekara nya pengudah bejadika Program Pemereti Ati Pasal Penyakit Denggi enggau Bomba diatur begulai enggau komuniti ba Rumah Dius Kusam, Kedoh ditu, kemari.
Kelimpah ari nya ku Friday, bisi tiga iti projek besai dilanggur nengah BDDA lumpar keterubah iya nya ngail projek ke deka digaga sitak Brayang enggau Mudong.
“Bisi mega mungkal jalai baru nya alai ba kandang menua Brayang-Mudong.
“Lumpar keterubah deka berengkah ari Jalai Roban masuk ke Jalai Supok Bratong lalu rembus ngagai Nanga Ibus.
“Udah nya deka ngemanah jalai ari SK Mudong terus ngagai Kop Ibus.
“Nya siti lalu ba area Kedoh kitai deka ngemanahka Jalai Kedoh terus nampung jalai ngagai menua di Nanga Atoi Awik.
“Nyadi tiga iti projek ke besai udah dilanggur ba menua Mudong, Brayang enggau Kedoh,” ku terang iya.
Ke penerang, entara projek Jalai Supuk ke Ibus ti deka digaga projek BDDA Lumpar Keterubah tu iya nya 17 kilometer, jalai ari SK Mudong ke Kop Ibus penyauh 6 kilometer enggau jalai ari Nanga Kedoh ke Nanga Atoi di Awik bisi 21 kilometer.-TVS
