ROBAN, 7 Dis: Kaban Kunsil Nengeri (ADUN) Krian Friday Belik madah, perambu Opis Menteri Pemansang Orang Indu, Anak Mit enggau Komuniti (KPWK) Sarawak ti deka ngatur Program Pemereti Ati enggau Advokasyen Pelajar Seksual (KAPS) di rumah panjai berengkah taun 2024 chukup nemban.
Ku iya, asil ari program nya dikearapka ulih mutarka kes penanggul rama lebih agi ngaul raban nembiak indu beranak tumu nadai laki.
Beduduk ari nya, Friday madah diri meri sukung penuh ngagai program nya lalu ngarapka program nya ulih ngurangka kes raban nembiak indu ngadaka anak nadai apai.
“Siti perambu ke manah laban nya diperambu deka dikerembaika ngagai menua pesisir lebih agi ngagai rumah panjai.
“Nya alai, aku nerima anggur program tu enggau ati tebuka sereta beterima kasih enggau penemu enggau atur ti udah deka dipejalaika opis menteri (KPWK),” ku iya.
Iya madah munyi nya lebuh dipinta meri timbal bekaul enggau langgur KPWK Sarawak ti deka ngatur Program Pemereti Ati enggau Advokasyen Pelajar Seksual (KAPS) di rumah panjai berengkah taun 2024 baka dipadah menteri KPWK Sarawak, Datuk Seri Fatimah Abdullah sebedau tu rambau Nutup Program Pemereti Ati Bekaul Penyakit Denggi enggau Bomba ba Rumah Dius Kusam ditu, kemari.
“Nya alai enti program ari KPWK tu ulih dikerembaika ngagai menua pesisir dia iya deka narak penemu, jaku lalau, kaunseling ngagai peranak rumah panjai lebih agi bala sida nembiak.
“Pengawa tu siti atur ke manah dikena kitai ngurangka kes nembiak baruh umur nya tadi beranak nadai laki tauka nikah kelalu tumu,” ku iya.-TVS
