KUCHING, 3 Dis: Siku ari pengari kelas main asal ASADIA Ellister Lowen anak Bonchai, beumur 25 taun madah diri berasai gaga sereta temegah amat ati laban mujur ngapuska Kelas Ajat Lelaki Iban ke diatur sepengelama dua bulan.
“Aku berasai gaga ati laban udah belajar ngajat sepengelama dua bulan enggau Serakup ASADIA malam tu chukup gaga laban udah ulih namatka tu mih taja memula suba sigi berat ati deka enggau laban agi malu.
“Nangika enda ulih nitihka chara orang ngajat tang kur semengat, Puji Tuhan diatu aku enggau lantang ulih namatka kelas ngajat tu,” ku iya maya dirandau TVS nyerumba pengawa Beserumpu Ngerami Tamat Kelas Main Asal Asadia Taun 2023 diatur ba Balai Raya Gerempung Bansa Dayak Bidayuh (DBNA) di Jalai Ong Tiang Swee ditu, malam tadi.
Kelimpah ari nya, ku Ellister iya mega berasai temegah laban ulih sama enggau ngetanka main asal Dayak Iban.
“Tuju aku enggau pengawa ngajat tu iya nya aku deka ngetanka adat main asal kitai laban kitai diatu udah majak mansang.
“Nangika adat pupu bansa kitai lenyau nya mih kebuah aku enggau belajar ngajat tu dikena ngetanka main asal kitai ngambika rebak dudi meruan ulih meda iya jemah,” ku tandu iya.
Sama bisi mansutka penemu, Emelia Natasha anak Sasi Kapor, 16 taun madah diri chukup beterima kasih ngagai ASADIA laban udah meri penemu main asal ke chukup beguna ngagai iya dudi hari.
“Meri besai terima kasih mega ngagai ASADIA laban udah ngajar baka ni chara ngajat.
“Perambu aku udah tu ila, aku bisi ati deka muka kelas ngajat ungkup sida ke deka belajarka main asal kitai Iban iya nya ngajat,” ku iya.-TVS
