DEBAK, 3 Dis: Raban Nembiak Parti Bumiputera Bersatu (PBB) Pampang Saribas dipinta regas agi ngatur progam ke bisi penau matak bala bujang dara masuk nyadi kaban parti nya.
Chairman PBB Pampang Saribas, Datuk Mohd Razi Sitam madah, tu beguna bendar dikena nyapai saran ke udah ditetapka parti PBB Pampang Saribas sebedau tu.
“Baka dipadah aku tadi sayap nembiak ke baru udah ditumbuhka tu patut regas agi ngatur program ke ulih dikena nambahka penyampau kaban lebih agi ari bala raban (umur) 18 taun ke atas.
“Kitai bisi saran senentang pekara bekaul ba DUN Saribas ke alai penyampau pengundi diatu udah manggai 17,000 iku.
“Nya alai kitai nyaran sepengabis mayuh mih sereta meransang semua peranak di Saribas lebih agi Bumiputera (dikearap) nyadi kaban PBB nyadika pelasar politik sida,” ku iya.
Iya madah munyi nya lebuh dirandau pengari TVS pengudah nutup Aum Parti Pesaka Bumiputera Bersatu (PBB) Pampang Saribas ditu, empai lama.
Nangkan ke nya, iya ke mega Kaban Kunsil Nengeri (ADUN) Saribas ngarapka pampang parti bukai dalam Gabungan Parti Sarawak (GPS) ba DUN Saribas patut sama chakah ngiga kaban baru parti.
“Pia mega enggau sida ari komponen parti (GPS) bukai ke bisi ditu (Saribas) patut sama chakah sereta bebendar agi nambahka penyampau kaban (baru) parti,” ku iya.
Ke penerang, bisi 200 iku kaban parti ari 24 bengkah pating parti PBB nyengkaum bala Tuai Raban Bansa (KMKK) ba sitak kunsil nengeri (DUN) Saribas lalu sama bisi datai ngulu aum nya ke diatur ba Diwan Millenea Debak.-TVS
