KUCHING, 3 Dis: Pengeransing Akademi Serakup Dayak Iban Sarawak (ASADIA) dalam ngerembaika adat enggau main asal Dayak endang patut disukung.
Kaban Kunsil Nengeri (ADUN) Batu Kitang Datuk Injinir (Ir) Lo Khere Chiang madah, kebuah pia laban nengah aktiviti kelas main asal ke bisi dibuka ASADIA dia ulih mantu ngetanka ‘identiti’ bansa Dayak sereta dikena nyeliahka raban nembiak ari ngereja pengawa ke negatif tauka jenayah.
“Ari aktiviti ke bisi diatur ASADIA tu abis nadai iya ulih mantu ngetanka identiti Dayak kelimpah ulih nyeliahka raban nembiak ari ari ngereja pengawa ke negatif baka jenayah,” ku iya.
Khere Chiang mansutka penemu nya maya lebuh bejadika pengawa Beserumpu Ngerami Tamat Kelas Main Asal Asadia Taun 2023 diatur ba Balai Raya Gerempung Bansa Dayak Bidayuh (DBNA) di Jalai Ong Tiang Swee ditu, malam tadi.
Nambah nya ku Khere Chiang, ari pengawa ngatur kelas main asal mega ulih nyadika pelasar dikena nerenak semangat beserakup entara pupu bansa di menua tu kelimpah asil produk ke digaga raban penyereta kelas ulih dikelakuka nyadi produk dagang temuai enggau pengawa dagang.
“Pengawa baka tu mega chukup manah dikena nerenak semangat beserakup lalu ngujungka pengidup lantang dalam komuniti di Sarawak.
“Nya alai, aku pechaya ari pengelandik ke diulih nengah pengawa baka tu ulih nyadi produk dagang enggau pematak penatai temuai ari sukut pemanah enggau penyelai ajat enggau kereban muzik bukai baka Taboh, Sape, Belikan enggau ke bukai tentu ulih dikena matak minat temuai ari menua luar,” ku iya.
Sama bisi datai ngulu pengerami tu Presiden Gerempung Dayak Iban Sarawak (SADIA) Sidi Munan, Tuai ASADIA Mabong Unggang, Tukang Wang SADIA Rukith Jampong enggau ke bukai.-TVS
