DEBAK, 1 Dis: Bala nembiak nyambut manah sereta beterima kasih ngagai Premier Sarawak Datuk Patinggi Tan Sri Abang Johari Tun Openg laban udah ngemendarka agih belanja ke chukup besai dikena mantu raban nembiak ari ruang bilik kurang pemisi tauka B40 ke belajar ba palan pelajar tingi (IPT) di menua tu.
Ku siku nembiak ba sebuah sekula ditu, Muhammad Alif Haiqal Mohamed bantu tu chukup besai reti ngagai raban nembiak sereta ulih nyadika peransang dikena belajar ba IPT.
“Kitai bela nemu tentu mayuh bup deka dibeli nyadi bantu baucher bup tu manah amat laban ulih ngelempungka ungkus bebelika bup ba luar,” ku iya.
Nangkan ke nya, ba penemu siku agi nembiak Dayang Nor Halyana Abang Mansor madahka bantu laptop enggau baucer bup ari perintah Sarawak nya chukup beguna lebih agi ngagai raban nembiak ari ruang bilik kurang pemisi tauka B40.
“Ungkup nembiak ti deka nampung pelajar ngagai IPTA tauka IPTS ba taun baru kebendar iya bantu dipadahka Premier Sarawak nya amat beguna lebih agi ngagai raban B40 ke bisi napi penanggul belanja dikena nampung pelajar ba IPTA,” ku iya.
Kepenudi, Vellarica Hubert Blakie mega madahka bantu laptop enggau baucher bup nya beguna bendar ngagai nembiak baka iya ke datai ari ruang bilik kurang bepemisi lebuh deka nampung pelajar ba IPT.
“Bantu ke diberi Premier Sarawak tu chukup beguna ngagai nembiak ke datai ari ruang bilik kurang pemisi, nadai tentu belanja.
“Chunto aku bisi siku agi menyadi sama bisi enggau nyambung STPM, nyadi ba aku bantu ke diberi Premier tu manah amat ngagai kami duai tambah mega ulih dikena ngelempungka tating ba kami sebilik.
“Bantu tu ulih mantu enggau meri peransang ngagai kami awakka ransing agi belajar dikena ngangkatka tikas pengidup ruang bilik,” ku iya.
Ungkup rikod, ba Bajet Sarawak 2024 Premier Sarawak Datuk Patinggi Tan Sri Abang Johari Tun Openg sepenyampau RM32.5 juta diungkupka dikena bejalaika dua bengkah inisiatif meri lato enggau baucher bup dikena mantu nembiak ari ruang bilik kurang penatai pemisi tauka B40.-TVS
