KUCHING, 29 Nov: Perintah Sarawak deka ngatur siri nemuai nerangka polisi enggau pelasar perintah nengeri ngagai rayat ngambika dipereti di serata nengeri tu.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madahka, adar pengawa nya deka diatur berengkah taun 2024.
“Sigi amat, mensia mayuh ba luar din agi enda meretika tauka agi bedau meretika senentang isi agih belanja tu enggau sekeda undang-undang ke bisi dibantai.
“Nya alai, aku pechaya ejensi baka TVS, UKAS sereta opis menteri deka ngatur program nemuai ngagai serap menua nengah program ke ngaul komuniti meri penerang pasal bajet tu ke alai bekaul enggau pengelantang sida,” ku iya madah.
Iya nerangka, ambika chunto Opis Menteri Pemansang Indu, Nembiak Mit enggau Pengelantang Komuniti (KPWK) mayuh fasiliti baru ti dibantaika baka Kenyalang Gold Card sereta mensia mayuh deka nemu antara bantu bukai ke bisi ditambah dalam kad nya.
“Enti nadai penanggul, program tu deka diatur berengkah taun baru sekalika pun taun tauka ke bukai nitihka timpuh opis menteri ke bekaul,” tandu iya.
Entudi ke nya, Abdullah ke mega Kaban Kunsil Nengeri (ADUN) Semop madahka penemuai ari sekula, Gerempung Ukai Dikuasa Perintah (NGO), sereta ejensi ke bekaul ngagai aum DUN nyadi pelantar ke manah alai perintah nengeri meri penerang ti silik ngagai rayat, tebal agi senentang pejuluk ti dipejuraika tetiap iku ADUN ti ngarika sitak sida.
Iya mega ngarapka dalam taun ti deka datai, raban nembiak nguna manah peluang datai nemuai ke begunan DUN ngambi ngemataka pengari rayat sida bejurai sereta mantaika juluk ti dirandaka rayat ari endur sida empu. – TVS
