SPAOH, 29 Nov: Program Aktif Menua Pesisir diatur asil inisiatif Opis Raban Nembiak enggau Lumba Sereta Main bagi menua Betong ulih nyadi siti platform ke manah dikena matak temuai ari luar datai ke menua pesisir.
Nya alai, Sapit Menteri Pemansang Orang Indu, Nembiak Mit enggau Pengelantang Komuniti Sarawak, Datuk Mohd Razi Sitam ngarapka Program Aktif Menua Pesisir tu ulih meri empas ke manah ngagai perayat di kandang menua nya, tebal agi ari sukut pengerai, pemansang rama sereta ke bukai.
“Arapka pengawa ngatur Program Aktif Menua Pesisir tu ulih meri empas ngagai komuniti nyengkaum ari sukut pengerai, pemansang rama enggau ke bukai.
“Aku mega andal program baka tu ulih matak pengerindu komuniti dalam pengawa lumba sereta nyadi sebagi ari daya idup ungkup pengerai,” ku iya.
Iya ke mega ADUN Saribas madah munyi nya lebuh Nutup Program Aktif Menua Pesisir diatur Opis Nembiak enggau Lumba (KBS) Bagi Menua Betong ba Diwan Panglima Brahim Tanjung Assam ditu, empai lama.
Nangkan ke nya, ku iya pengawa ngatur program baka nya ulih dijadika platform dikena ngelakuka siti-siti palan tauka endur lebih agi ba menua pesisir.
“Pengawa ngatur program baka tu ulih nyadi platform dikena ngelakuka palan ke bisi di menua pesisir.
“Baka nyadi palan dagang temuai lumba nengah pengawa ngatur achara ke nguna fasiliti ke bisi ba sesebuah kandang endur tauka genturung pendiau,” ku iya.
Sama bisi datai ngulu pengawa nya Pegawai KBS Bagi Menua Betong, Nurul Zamzam Shafie, bala tuai raban bansa sereta ke bukai.-TVS
