SPAOH, 29 Nov: Pegawai Opis Nembiak enggau Lumba Bagi Menua Betong, Nurul Zamzam Shafie madah, tuju Program Aktif Menua Pesisir diatur dikena nerenak daya idup bepengerai ungkup komuniti ba menua pesisir.
Ku iya, program nya mega diatur dikena ngerembaika akses perengkaguna lumba kelimpah nyerungkai penau enggau bakat raban nembiak di menua pesisir.
“Kebendar tuju program tu diatur dikena nambahka akses ngagai nguna kereban lumba ungkup pengani di menua pesisir.
“Kelimpah ari nya, program tu mega dikena ngelala bakat nembiak dalam bidang lumba, nyadi tuai enggau nambahka ikas pengerai komuniti,” ku iya.
Nurul madah munyi nya maya pengawa bejadika Program Aktif Menua Pesisir ke dikemujurka Kaban Kunsil Nengeri (ADUN) Saribas Datuk Mohd Razi Sitam ba Diawan Panglima Brahim Tanjung Assam ditu, empai lama.
Nangkan ke nya, Nurul ngarapka program nya ulih mantu nyapai juluk perintah ti deka ke rayat di menua ulu ngemeranka daya idup ti bepengerai.
“Anang mudah putus pengarap terus nguji lalu terus regas mekuhka daya idup bepengerai laban tu entara siti agi tuju besai program tu diatur.
“Kelimpah dikena ngeala bakat enggau penau raban nembiak di menua pesisir, aku mega arapka nengah program baka tu tuju perintah ti dekaka semua rayat di Malaysia ngemeranka daya idup bepengerai, nelap, beserakup sereta ngembuan semangat bekerejasama dikena nyapai pemujur,”ku tandu iya.
Ke penerang, program tu keterubah diatur Opis Nembiak enggau Lumba (KBS) Bagi Menua Betong.
Bisi 300 iku orang ngulu program nya ke diatur berengkah ari pukul 7.00 pagi nyentuk ke pukul 6.00 lemai ba Diwan Brahim Tanjung Assam Spaoh.-TVS
