SPAOH, 29 Nov: Peminta mensia mayuh di Tanjung Assam ti randa ke gelanggang futsal enggau sebuah diwan mayuh guna ba endur nya deka dipasuk ke baruh ba Projek Transformasyen Menua Pesisir (RTP).
Sapit Menteri Pemansang Orang Indu, Nembiak Mit enggau Pengelantang Komuniti Sarawak Datuk Mohd Razi Sitam ngarapka peminta serak tu enda betukar agi baka ke udah.
“Kebendar peminta ngemanahka diwan tu udah dipasuk ke aku ba rintai RTP (DUN Saribas).
“Aku endang ari suba deka ngemanahka diwan tu tang sida minta ditukar ngagai taba bukai.
“Arapka serak tu peminta nya enda berubah agi lalu nguji masukka baru laban tu deka nangkup fasiliti ke bisi laban kandang endur tu chukup strategik endur gelanggang futsal, (tanah) sepiak diwan nya agi puang,” ku iya.
Iya munyi nya maya nutup Program Aktif Menua Pesisir Renggat Bagi Menua Betong 2023 ba Diwan Panglima Brahim Tanjung Assam ditu, empai lama.
Taja pia, ku iya ke mega Kaban Kunsul Nengeri (ADUN) Saribas madah, semua proses bejalaika projek nya bepanggai ba pemendar ari raban tauka opis ke bekaul.
“Peminta nya begunaka pemutus ari Kepala Pengajar laban padang nya dalam sekula.
“Reti iya enti projek nguna turu ari perintah nengeri mesti bisi proses nyeruri enggau aplikasyen sereta ke bukai, kelimpah pemendar ari pengempu tanah iya nya Opis Pelajar Nengeri Sarawak,”ku terang iya.-TVS
